“Azərxalça” ASC-nin İdarə Heyətinin sədri Vidadi Muradovun külli miqdarda mənimsəmədə şübhəli bilinərək həbs edilməsi, ölkədə korrupsiyaya qarşı aparılan mütəmadi mübarizəyə rəğmən, hələ də ciddi neqativ halların davam etdiyini göstərir.
Maraqlıdır, bunca həbslərə rəğmən bəzi məmurların dövlət əmlakını talamaqda davam etməsi nə ilə izah edilə bilər? Doğrudanmı həbs təhlükəsi məmur kontingentini qorxutmur?
Moderator.az-a açıqlama verən siyasi elmlər doktoru, politoloq Cümüd Nuriyev məsələ ilə bağlı maraqlı fikirlər səsləndirib:
“Aparılan təhlillər göstərir ki, həbs olunmaq bu məmurları qorxutmur. Çünki həbs olunanlar “içəridə” özlərini çayda balıq kimi hiss edirlər. Bunlar üçün orada hər cür şərait yaradılır. Sanki həbsə deyil, kurorta gəliblər.
Bizdə vəzifədə olanların hamısı bir-birinə bağlı adamlardır. Birinə həbs eləsələr də, digərləri onun ailəsinə baxır, onun biznesini davam etdirir. Bizdə bir növ tayfa hakimiyyəti formalaşıb. Bacanaqlar, qudalar, yeznələr, kürəkənlər və s. Onların hamısı bir-birinə bağlı adamlardır. Buna görə də cənab prezident birini işdən azad edən kimi, onun yerinə bir neçə yaramaz məmur çıxır.
Üçüncü amil onların psixoloji durumu ilə bağlıdır. Korrupsioner məmurlarda özlərinə aşiqlik xəstəliyi var. Baxın, sosial şəbəkələrdə bir sıra rayonların icra başçıaları haqqında ciddi tənqidlər səslənir. Elə icra başçısı var ki, özü qalıb kənarda, rayonu atası idarə edir. Bu, nə deməkdir? Bütün bu məlumatlar məmur qudurğanlığının hansı səviyyədə olduğunu göstərir”.