Aqşin Məmmədli Mahir oğlu (Aqşin Mahir) Lənkəran rayonunun Lüvəsər kəndidə anadan olmuş və həmin kəndin tam orta məktəbində təhsil almışdır. Azərbaycan Maliyyə-İqtisad Kollecində təhsil almış və fərqlənmə diplomu ilə bitirmişdir. Aqşinin orta məktəb illərindən sözə, ədəbiyyata marağı olmuş və Mahir təxəllüsü ilə şeirlər yazmağa başlamışdır. Şair "Ağac" adlı şeirinə görə çoxsayılı şairlərin müsbət rəyi ilə ölkə üzrə 2022-ci ilin "İlin ən gözəl şeiri" kimi AYB-nin sertifikatını almışdır. Bundan əlavə şairin qələmə aldığı bir neçə şeiri ölkənin bir çox mətbu orqanlarında dərc olunmuşdur. AYB-nin Lənkəran Bölməsinin orqanı olan "Şəfəq" jurnalının 2022-ci il bir neçə sayında şairin bir sıra şeirləri dərc olunmuşdur. Hazırda şair ədəbi fəaliyyətini AYB Lənkəran Bölməsi ilə əlaqəli olaraq davam etdirir. Şair ilin sonuna ilk kitabı olan "Sevgi sizlikdir" adlı kitabı ilə oxuyucuların görüşünə gələcək.
Ağac
Tənha bir ağacam yol qırağında.
Bilmirəm dərdimi danışım kimə.
Budağımın yarpaq açan çağında,
Qorxuram ki,balta dəyər kökümə.
Elə düşünür ki,adamlar ey vah
Bəxtəvər ağacın yoxdur qorxusu.
Bir gün yağdırmasa yağışı Allah,
Kim mənə verəcək bir içimlik su ?
Kiminə kölgəyə,başqa kəsin də,
Gözündə bəhərli budaq kimiyəm.
Evsiz adamların düşüncəsində,
Taxtadan hörülmüş otaq kimiyəm.
Kiminin gözündə ocağam,odam
Çoxları yandırıb məni isindi.
Qışda atəşim ilə isinən adam,
Çox soyuq davranır mənimlə indi.
Cəlladım gözləyir yolumu hər dəm,
Bu uca görkəmim qısa olacaq.
Məni yıxılmağa qoymayan gövdəm,
Bəlkə bir qocaya əsa olacaq.
Allahın kəminsaf zalım bəndəsi
Zərbəsi önündə aciz qalacam.
Kim bilir bəlkə də mən həmən kəsi
Məzara aparan tabut olacam.
Məni üzü üstə yıxan adamın.
Hikkəli səsindən xeyli yoruldum.
Bəlkə axırıma çıxan adamın.
Bir gün məzarına nişangah oldum.
RƏSSAM, SEVGİLİMİN RƏSMİNİ ÇƏKMƏ
Rəssam, sevgilimin rəsmini çəkmə.
Mənim həsrət çəkən gözlərimi çək.
O qızın ardıyca kölgələr kimi,
Sürünən bu yorğun dizlərimi çək.
Çək hər gün yol çəkən baxışlarımı,
Baxanlar hiss etsin kövrəkliyimi.
Çək gözaltımdakı qırışlarımı,
Sahildə sürüşən torpaqlar kimi.
Çək şeir yazdığım otaqda nə var,
Önümdə ağ kağız, əlimdə qələm.
Elə çək, anlasın baxan adamlar,
Mən də Müşfiq kimi xoşbəxt deyiləm!
SON PAYIZ GECƏSİ
Dünyanın zövqünə qul olmuş biri,
Səni heç özünə arxa bilərmi?
Məni ölüm ki var, qorxuda bilməz,
Dustaq azadlıqdan qorxa bilərmi?
Əbədi həyata sənsən bələdçi,
Son nəfəs dirilik gətirən sudur.
İndi ölümdən çox Allaha qarşı,
Çıxdığım məqamlar məni qorxudur.
Payız gecəsinin tutqunluğunda,
Dünya gözlərimdə qəribdir, qərib.
İçirəm razılıq şirinçayını,
Allah ruhum üçün elçi göndərib.
ATAM ÖLMƏSƏYDİ
Atam ölməsəydi, mən nə yazardım?
Uğursuz sevgidən? Yox, inanmıram.
Ömründə itkisi olmayanların
Şair olmasına çox inanmıram.
Payızın saralan xəzəllərindən,
Yağışa söz qoşub durulacaqdım.
Mən bu təbiətin hər bir üzünə
Şeirlər yazmaqdan yorulacaqdım.
Ömrüm nağıllartək başlamasaydı,
Körpə könüllərə su tək sızardım.
Atamın aldığı qələmlər ilə
Abdulla Şaiqtək şeir yazardım.
Anam şair kimi böyütdü məni,
Yoruldum, çiynimdən çantamı aldı.
Bəlkə də şair tək böyüyüm deyə,
Allah Müşfiq yaşda atamı aldı.
SON ŞEİR
Bir gecə yuxudan ayılıb qəfil,
Görərsən, yatdığım çarpayı boşdur.
Nə yaman səssizdi, ona elə bil
Gecəni kimsəsiz keçirmək xoşdur.
Yuxulu-yuxulu bir də baxarsan,
Gecəni yarımcan yatdığım yerə.
Qalxıb aynabəndə tərəf çıxarsan,
Gözündə canlanar fərqli mənzərə.
Təşvişin artırar iztirabını,
Özünə səbr edib döz deyəcəksən.
Su dolu bardağı, dərman qabını
Masanın üstündə görməyəcəksən.
Deyərsən, harasa gedibmi görən?
Qapını kilidli görərsən ancaq.
O titrək səsinə səssiz hay verən
Divardan asılmış şəkilim olacaq.
Ay mənə bir ömür yoldaş olanım,
Ömrüm son şeir tək yetəcək sona.
Kölgətək başının üstə dolanım,
Ölsəm, çox üzülmə, dözmərəm buna.
BURDA PAYIZ FƏSLİDİR
Burda payız fəslidir.
Yenə şıltaq küləklər
rəqsə dəvət eyləyir
xəzəl yarpaqlarını.
Göy üzünün günəşi
ərəb qadını kimi
çarşab altda gizlədir
sarı yanaqlarını.
Şimşəklərin səsini
lal edən bu yağışlar
ac quş tək dimdikləyir
saçımın ağlarını.
Sahildə balıqçılar
gümüş bilərzik kimi
balıqların boynuna
taxır qarmaqlarını.
Sonra həmin balıqlar
ölü balıqçıların
məzarına göndərir
balıqqulaqlarını...
Cenub.az saytı üçün hazırladı ƏLİZAMAN BAXIŞ.