Əvvəllər xəbər verdiyimiz kimi Masallıda Təhsil Fondu yaradılıb və fond təhsilə, xüsusən qızların təhsilinə ciddi diqqət yetirir. Hazırda fond əməli tədbirlərə başlayıb. Belə ki, “Masallı Təhsil Fondu” Masallı 70 saylı Seçki Dairəsinə daxil olan Masallı şəhər, Musaküçə, Yeddioymaq, Şərəfə, Səmidxan, Qarğalıq, Həsənli, Xırmandalı, Banbaşı, Çaxırlı ərazi dairələrindən bu il orta ümumtəhsil məktəblərini bitirmək üzrə olan 267 qıza Riyaziyyat, Azərbaycan və İngilis dili üzrə pulsuz test kitablarının paylanılmasına start verib. Kitabçalar Fondun təşkil etdiyi 2 qrup tərəfindən şagirdlərin hər birinə öz evində təqdim edilir. Təqdimat zamanı onlarla qısa söhbətlər aparılır və izah edilir ki, əgər ölkənin dövlət hesabına maliyyələşən Univeristetlərinin müəllimlik ixtisası verən fakültələrinə 300-dən artıq balla daxil olsalar, onlara Masallı Təhsil Fondu tərəfindən təqaüd veriləcək. Yaxud, ödənişli ali məktəblərə qəbul olunarlarsa, onların təhsil xərcələri qarşılanacaq.May ayının 21-də qrup üzvlər Musaküçə, Yeddioymaq, Banbaşı, Qarğalıq, Şərəfə və sair kəndlərdə test kitabçalarının evbəev paylanmasına start veriblər.
Təkcə Yeddoymaq ərazisində 5 qızın Azərbaycan dili və ədəbiyyatı, coğrafiya və tarix müəllim olmaq istəyi aşkarlanıb.
Lakin bəzi neqativ hallar da qeydə alınıb. Təkcə bir məktəbdə orta məktəbi bu il bitirəcək 17 qızın 8-nin nişanlı olduğu məlum olub.
Fond üzvlərinin evbəev gəzməsi sakinlər tərəfindən böyük razılıqla qarşılanıb.
Onu da xatırladaq ki, test kitablarının paylanmasında Hekayət Nəzərov, Hüseyn Hüseynov, Fidan Abbaslı, Əntiqə Tağıyeva, Əkbər Mahmudov, Aynur Abbasova, Araz Şahverdiyev, Rəmzi Şahverdiyev yüksək fəallıq göstərib. Kitabların paylanması may ayının 24-nə kimi yekunlaşacaq. Seçilmişlərlə əlavə görüşün olacağı da gözlənilir.
Məlumat üçün bildirək ki, bu güzəştlər ancaq Masallı 70 saylı seçki dairəsində yerləşən ərazilərdəki məktəblərin şagirdlərinə şamil ediləcək.
Zahir Əmənov, cənub.az
