Çər. axşamı   8 sentyabr 2020   22:48:20  

Mehman Əliyev Heydər Əliyevi ölümün əlindən necə xilas edib? - TARİX...


Heydər Əliyevin xilaskarı

Coxdanın söhbətidir. Bir dəfə Rauf Arifoğlu mənə dedi ki, Mehman Əliyevlə görüş, müsahibə götür. Biləsən ki, o, Sovet vaxtı Xəzərdə batan Heydər Əliyevi xilas edib. Təsadüf elə gətirib ki, Heydər Əliyevin cangüdənlərinin başı qarışıb və o, batmağa başlayıb. Özünün çatdıran Mehman bəy Heydər Əliyevi xilas edib. Təbii ki, Mehman bəy kimi xilas etdiyinin fərqində olmayıb. Yalnız cangüdənlər hərəkətə keçəndən sonra məsələ aydınlaşıb. Mehman bəy bu barədə danışmağı sevmir. Amma sən çalış ki, bu məsələni mümkün qədər çox qabart. Oxucular üçün bu məqam son dərəcə maraqlı olacaq...
Tezliklə Mehman bəylə görüşdüm. Müsahibənin ortasında söhbəti bu məqama yönəltdim. Hər şey Rauf bəy deyən kimi oldu. Mehman bəy "bu, köhnə söhbətdir", deyərək məsələnin üstündən sükutla keçməyə çalışdı...
Ancaq mən də təkidlə müsahibimi "Heydər Əliyevin xilasına" işıq salmağa yönəltdim. Və sonda Mehman bəy Azərbaycan tarixini dəyişə biləcək həmin olayı təfərrüatına kimi açıqladı...

Onu da deyim ki, həmin müsahibə "Yeni Müsavat"da gedib. İndi kimsə o yazını tapsa və həmin müsahibə təkrar cap olunsa, geniş rezonans doğurar...

O vaxt Heydər Əliyev Azərbaycan prezidenti idi. Orasını da dəqiq bilirəm ki, prezident "Yeni Müsavat"ı şəxsən oxuyurdu. Çünki Heydər Əliyevin qəzetdə gedən bu və ya digər yazı ilə bağlı konkret göstərişlər verməsi haqqında əlimizdə dəqiq məlumatlar vardı. Əgər Mehman bəyin dediklərinə Heydər Əliyevin zərrəcə etirazı olsaydı, hər hansı bir kanalla bunu bizə dərhal çatdırardılar...
Mehman Əliyev sözün həqiqi mənasında Heydər Əliyevi ölümün əlindən xilas etmiş adamdır. "Turan" İnformasiya Agentliyinin 30 illik şefini deyirəm...

Bu gün Heydər Əliyevin doğum günüdür. Şübhəsiz ki, Mehman Əliyev o vaxt Heydər Əliyevi xilas etməsəydi Azərbaycanın ən azı son 30-40 illik tarixi tamam başqa cür yazılacaqdı...

O tarix indikindən yaxşımı, pismi olacaqdı, birmənalı cavab vermək çətindir. Bəli, tarix yalnız bir dəfə yaşanır, antik yunanların dediyi kimi, bir çayda yalnız bir dəfə çimmək olur...

Elbəyi Həsənli, İsveçrədə yaşayan jurnalist





Copyright © 2013 - 2021
Bütün hüquqlar qorunur.
MATERİALLARDAN İSTİFADƏ EDƏRKƏN PORTALIMIZA İSTİNAD ZƏRURİDİR!!!
Şikayət və təkliflərinizi qeyd edə bilərsiniz.
Created: Webmedia.az
Baş redaktor: Zahir Amanov
Tel: +99450(70)3227523
Email: [email protected]
Ünvan: Masallı rayonu, S. Vurğun küç.10