Yaxud adsız xeyriyyəçi yüzlərlə ailəni necə sevindirdi?
Ölkə miqyasında xeyriyyə aksiyaları günbəgün genişlənir. Artıq bu barədə adi xəbərlər oxucunu çəkmir. Oxucu, daha yeni formalı, daha yüksək məbləğli xeyriyyə tədbirləri eşitmək istəyir. Məsələn, 3-4 gün öncə Lənkərandan belə xəbər gəldi ki, adını açıqlamaq istəməyəm vəzifəli şəxs Lənkaranda 1000 adama hər biri təxminən 50 manat dəyərində ərzaq paylayıb. Yardımlıdan gələn xəbər isə daha maraqlıdır. Necə deyərlər, axı niyə?
Deməli, Yardımlı şəhərindən 5 kilometr aralıda Dəryavar adlı bir kənd var. Kənddə 435 nəfər insan yaşayır. Kəndəki evlərin sayı isə 50-yə yaxındır. Bu yaxınlarda adının aıqlanmasını istəməyən, şəhərdə yaşayan yardımlılı xeyriyyəçi kəndə gələrək buradakı yeganə mağazanın müdirini yanına çağırıb. Ondan xahiş edib ki, kənd sakinlərinin mağazaya borcu olan dəftəri ona göstərsin. Dəftərə baxanda bəlli olub ki, bu xırda, 50 –yə yaxın ev olan kənddə sakinlərin mağazaya nə az, nə çox -6 min 700 manat borcu var. Təxminən hər evin 100-150 manat arası. Həmin yardımsevər dəftərdəki bütün borcları ödəyib, rəqəmləri sıfırlayaraq həmin “nisyə sənədini” ləğv edib. Beləliklə onlarla ailə neçə ayların, illərin xəcalətindən xilas olub. Həmyerlilərinin bu təmənnasız, reklamsız addımı kənd sakinlərinin böyük sevincinə səbəb olub.
Yerli sakinlərin məlumatına görə, həmyerlilərinin bu alicənablığı onlarda həm də böyük qürur doğurub.
Məlumatı yardımlılı şair-publisist Əsədulla Sadıqov öz FB səhifəsində paylaşıb.
Cenub.az. Abdul Əsgərli