İran prezidenti Həsən Ruhani koronavirusla bağlı dünyanın ölkə rəhbərlərinə məktub ünvanlayıb.
Cenub.az-ın konkret.az-a istinadən məlumatına görə, H.Ruhani öz məktubunda bildirib ki, bu epidemiya sərhəd tanımır, qurbanlarını da siyasi, milli, irqi və dini fərqliliyinə görə seçmir.
Məktubda qeyd olunur ki, bu virusla beynəlxalq və regional əməkdaşlıq çərçivəsində eləcə də koordinasiyalı şəkildə mübarizə aparmaq lazımdır. Xalqın ehtiyacları təmin edilməli, yoxsul və az gəlirli insanlara maliyyə yardımı göstərilməli, tibbi və müalicə xərcləri həyata keçirilməlidir.
“Bu kimi əlavə xərclərə ehtiyac var. Digər tərəfdən bunları icra etmək üçün güclü iqtisadi dayaq və maliyyə vəsaitinə ehtiyac var. İran İslam Respublikası digər ölkələrdən fərqli olaraq daha çox maneə və ciddi məhdudiyyətlərlə üzləşib. Bu məhdudiyyətlər son 2 ildə ölkəmizə qarşı tətbiq olunan qanunsuz sanksiyalardan və ABŞ-ın tək qütblü maksimum təzyiq siyasətindən irəli gəlir. ABŞ son illər ərzində İrana qarşı 100-dən çox sanksiya tətbiq edib. 1200 dən çox İran rəsmisini öz sanksiya siyahısına salıb. Bu sanksiyalar 2 ildən az bir müddətdə İran iqtisadiyyatına birbaşa 200 milyard dollar ziyan vurub. Bütün əcnəbi şirkətlər bu sanksiyaları icra edir. ABŞ bu geniş yayılmış böhranın pik həddində belə utanmazcasına digər ölkələrdən İrana humanitar yardım göndərməməyi tələb edir”.
Bundan əlavə, Prezident bildirir ki, İran koronavirusla mübarizədə atdığı addımlarla bağlı ÜST-ə məlumat verib:
“Bu böyük və təhlükəli koronavirus böhranının idarə edilməsi təklikdə heç bir ölkənin gücündə deyildir. Hələ beynəlxalq bazarlara və maliyyə sistemlərinə əli çatmayan öz ehtiyaclarının təminində problemlərlə üzləşən bir ölkə üçün heç də asan deyil.”
İran prezidenti koronavirusla mübarizə və onu məğlub etməyin yolunu ümumdünya öhdəlik adlandırıb və ölkə rəhbərlərindən istəyib ki, elə bir mexanizm və çıxış yolu düşünsünlər ki, BMT-nin 2231 qətnaməsinə əsasən bütün ölkələr öz öhdəliklərini yerinə yetirsin, ABŞ-ın qanunsuz sanksiyaları təsirsiz olsun və iqtisadi terroru dayandırılsın.
H.Ruhaninin sözlərinə görə, artıq vaxtı çatıb ki, dünya ABŞ-ın bu kimi quldurluğunun qarşısında dayansın. İcazə verməsin ki, onun zülmkar sanksiyaları İran xalqının koronavirusla mübarizəsinə təsir göstərsin.
Həsən Ruhani bildirib ki, ABŞ-ın İrana qarşı qanunsuz sanksiyaları və digər ölkələrin buna əməl etməsi BMT qətnamələrinə zidd olmaqla yanaşı həmdə qeyri-etik və insanlığa sığmayan bir addımdır.