"Transformatoların heç biri mühafizə zolağına alınmayıb, bu da təhlükə mənbəyidir"Masallının Boradigah qəsəbəsinin bir qrup sakini ölkə başçısı İlham Əliyevə və "Azərişıq” ASC-nin sədri Vüqar Əhmədova müraciət ediblər.
Onlar qəsəbədə elektrik enerjisinin acınacaqlı vəziyyətdindən bəhs ediblər.
Sakinlər deyirlər ki, mövcud vəziyyətlə bağlı təcili tədbir görülməlidir.
Onlar ölkə başçısından kömək istəyirlər.
Müraciət edənlər içərində Qarabağ qaziləri də var.
"Hörmətli Prezident, hörmətli Vüqar müəllim, son illər ölkənin enerji sektorunda həyata keçirilən böyük layihələrin biz də şahidiyik. Cənab prezidentin açılışını etdiyi obyektlərin sırasına diqqət etsək, burada əhalinin keyfiyyətli enerji təminatına hesablanan obyektlər şübhəsiz ilk yerdə olacaq. Amma, təəssüf ki, ölkənin ən böyük şəhər tipli qəsəbələrindən biri olan Masallının Boradigah qəsəbəsində tamam fərqli və dəhşətli bir mənzərə mövcuddur. Bu qəsəbənin 10 mindən artıq sakini var. Qəsəbədə iki məktəb, xəstəxana, poliklinika, polis bölməsi və digər dövlət qurumları fəaliyyət göstərir", - deyə sakinlər qeyd ediblər.
Onların sözlərinə görə, son illər qəsəbənin enerji təminatı sahəsində görülən tək əsaslı iş sayğacların kütləvi dəyişdirilməsidir: "Qəsəbədə mövcud olan işıq dirəklərinin və transformatorların əksəriyyəti istismar müddətini bitirmiş və bərbad vəziyyətdədir. Transformatoların istisnasız olaraq heç biri mühafizə zolağına alınmayıb. Bu isə əsl təhlükə mənbəyidir. Onların yağla təminatı bərbad vəziyyətdədir. Nisbətən normal durumda olanların yüklənməsi çox olduğundan əksər məhəllələrə verilən gərginlik normalda 220-230 V olmalı halda, 190-195-dən çox olmur".
"Məişət texnikalarının az gərginlik verilməsi və qısa qapanma səbəbindən sıradan çıxması adi haldır. Əksər evlərdə kondisionerlər və məişət texnikaları əlavə stabilizatorlar hesabına çalışır. Hazırda qəsəbə əhalisinin xeylisi bəlli səbəblərdən Bakıda və ölkədən kənarda yaşayır, yəni işıqdan istifadə etmir. Bu isə o deməkdir ki, tam yüklənmə olarsa, vəziyyətin bəhs etdiyimizdən də daha acınacaqlı olduğu ortaya çıxacaq", - sakinlər belə deyirlər.
Sakinlər qeyd ediblər ki, problem yaradan ən böyük səbəblərdən biri də Tüklə kəndindəki yarım stansiyadan Boradigaha gələn bir neçə kilometrlik məsafədəki əsas elektrik naqillərinin və dirəklərin bərbad olmasıdır:
"Bu səbəbdən güclü olmayan bir külək xətlərdə qırılmalara, saatlarla işıq kəsilməsinə səbəb olur. Texniki qüsurlar səbəbindən əksər hallarda kiçik bir ərazidəki təmir səbəbindən bütün qəsəbədə işıq keçirilir. Böyük bir qəsəbəyə operativ nəzarət olduqca zəifdir. Əksər hallarda kiçik bir problemdən ötrü əhali saatlarla ora-bura zəng etmək məcburiyyətində qalırlar. Hörmətli prezident, hörmətli Vüqar müəllim Sizdən xahiş edirlk, bu problemi şəxsi nəzarətinizə götürüb problemin həlli ilə bağlı operativ göstəriş verəsiniz".
Müraciəti Ədalət Əhmədov - müəllim; Məmməd Məmmədov - müəllim; Böyükağa Zeynalov - müəllim; Elçin Əhmədov - müəllim; Rasif Talıbov - şəhid atası; Elmar Yusifov - Qarabağ qazisi; Əzim Məmmədov Qarabağ qazisi başda olmaqla 20 nəfər imzalayıb.
"Azərişıq” ASC müraciətə münasibət öyrənmək olmayıb./arqument.az
