Bağışov Etibar Çapar oğlu (Etibar Qara)
1961 –ci ildə Yardımlı rayonu, Nisəqala kəndində
anadan olmuşdur. 1978 –ci ildə Çayüzü kənd orta
məktəbini, 1984 –cü ildə Azərbaycan
İnşaat Mühəndisləri İnstitutunu bitirmişdir. Hal-hazırda
Tikinti mühəndisi kimi çalışır. Sumqayıt şəhərində
yaşayir. Evliyidir, 4 övladı var.
“Göylərə uzanıb əli sevdamın” və “Ürəyim boyda dərdim”
adli kitablarım çap olunub.
Sənin göylərdə nə işin,
Başdan başa torpaq adam?
Kimi özü, kimi qoşma,
Kötüklərə sən baş qoşma,
Mehə əsən yarpaq adam.
xxx
Uçmaq kimi yox vərdişin,
Sənin göylərdə nə işin,
Başdan başa torpaq adam?
xxx
Gecələri nurun boğur,
İçində bir dunya doğur,
Çöl-bayırı çılpaq adam.
xxx
Ağızlar cır, dil calaqtək,
Sozü şillə, şapalaqtək
Ağızlara qapaq adam.
xxx
İs vermirlər altmış yaşda,
Adamım da yoxdur basda,
İndi hardan tapaq adam?
xxx
Çox özünü, yorma sən də,
Qeyrət tapmaz geydirsən də,
Qeyrətsizə papaq, adam.
Az əl götür Allaha,
Mələkləri şad deyil.
Vərəqdə vətən qurub,
Sərhəddin çəkən nə çox.
Qələmlə şumun vurub,
Dən səpib, əkən nə çox.
xxx
Deyilmiş fikri ha yaz,
Bazar meyvəsi kimi.
Sözdə hər təzə avaz,
Novruz heybəsi kimi.
xxx
Çicəyə qonmur arı,
Bilirmi qənd yediyin?
Hər yan qarğa bazarı,
Qanmır ağız dediyin.
xxx
Hicrandan yazma daha,
Qulaqlara yad deyil.
Az əl götür Allaha,
Mələkləri şad deyil.
xxx
Ölümün də hər gecə,
Tutur bizi yuxusu.
Oğurlanır gör necə,
Ömrümüzün çoxusu.
Göyə çıxanda hələ diriydi,
Göylərdən yerə yıxıldı Vətən.
Qaranlıq bir yol tutub gedirik,
Yolun üstündə tikan var, daş var.
Bu daşlı yolu udub gedirik ,
Üstündə neçə kəsilən baş var.
xxx
Anası varmı dizinə döyə?
Şəhid vətənçün dura, yola saç.
Tanrı da göydən çəkilib göyə,
Ha özünü yor, göyə ha əl aç.
Bu ağrıların görünmür sonu,
Vətəni göyə özüylə çəkir.
Gör necə qurub quran oyunu,
Hər gün şəhidi köksünə əkir.
xxx
Vətən ölür hər gün şəhid-şəhid,
Öz bayrağına bükülür Vətən.
Qatil özünə saxlamır şahid,
Səhid qəbrinə tökülür Vətən.
xxx
Xərçəng xəstəsi bu Vətən kimi,
Hər əzasında toxuması var.
Ağ xalat geyən iblis həkimi,
Həm də fatihə oxuması var.
xxx
İnanc yeriydi, qibləgah idi,
Qan çanağına dönüb göy indi.
Vallah, bu oddan yer agah idi,
Heç tüstülənmir bir kösöy(v) indi.
xxx
Şəhid olanlar şahidləriydi,
Ürəyində çox sıxıldı Vətən.
Göyə çıxanda hələ diriydi,
Göylərdən yerə yıxıldı Vətən.
xxx
Dolu yerinə, yağış yerinə,
Tutub göyləri istiqlal qanı.
Bir dəyirmanın düşüb pərinə,
Dolanır bütöv Azərbaycanı.
Sevinc məni ayaq saydı,
Dərd içində baş adamam.
Üzüyumşaq, tez aldanan,
Dost-tanışa boş adamam.
Məni sancan düşmənimə,
Mən ürəkdən daş adamam.
xxx
Bir üzüm qış, biri yaydı,
Ömrümdə hər yer dolaydı.
Sevinc məni ayaq saydı,
Dərd içində baş adamam.
xxx
Qoysan gülə arı yana,
Bar verməz hər darıyana.
Mənimlə tərs sarıyana,
Baxışımda çaş adamam.
xxx
Xoşa gəlmir hər gərdişim,
Düz danışmaq pis vərdişim.
Bir hakimə düşdü işim,
Dedi:-işi yaş adamam.
Bu ömür mənə dar ağacı qurub,
Kəndirin boynuma salıb qurtarmır.
Ürəyim də cansız, vərəq kimidir,
Yetənə atıram ölüb qurtarmır.
Gündə boğazıma yığılır canım,
Öz canını məndən alıb qurtarmır.
xxx
Ölüm yoxuşu lap adamı yorub,
Gədiyini aşmaq gözümə durub.
Bu ömür mənə dar ağacı qurub,
Kəndirin boynuma salıb qurtarmır.
xxx
Nə gundüz bəyazdır, nə gecə siyah,
Gözlə ki, gələcək işıqlı sabah.
Borc kimi sələmdən artdıqca günah,
Hər gun Allah silir, silib qurtarmır.
xxx
Daha zəhləm gedir öz pəncərəmdən,
Əskik olmur ki, yad göz pəncərəmdən.
Hər şeir yazanda, söz pəncərəmdən
Bir dəli hey gülür, gülüb qurtarmır.
xxx
Hər xoş nəvazişə mən ürək sərdim,
Ürək açana yer başda göstərdim.
Bütövləşmək kimi böyükdür dərdim,
İllərdir yol gəlir, gəlib qurtarmır.
Dedilər, sözün düzu
Dəlidən , səydən çıxdı.
Düşəndə ağlım küyə,
Qulağım küydən çıxdı.
Biri, -"hey" çağıranda,
Düşüncəm heydən çıxdı.
xxx
Yiyəsiz boş torpağam,
Bilinməz kimdir ağam.
Dilənçi bir uşağam,
Çörəyim neydən çıxdı.
xxx
Calxayan nehrəmizi,
Firladır cəhrəmizi.
Sarıdı cəhrə bizi,
Düyçəsi iydən çıxdı.
xxx
Məzəsi, meyi günah,
Donuzun piyi günah.
Adamına bax, Allah,
Piylənib piydən çıxdı.
xxx
Kürsülər qarnı iri,
Hər kəsin olmaz yeri.
İki-üç sozdən biri,
Zaddan, ya şeydən çıxdı.
xxx
Sürünü qurdlar sökər,
Leşinə çaqqal çökər.
Bəyləndi durub nökər,
Bəyliklər bəydən çıxdı.
xxx
Xəbərin qara üzü,
İnanmaq olmur düzü.
Dedilər, sözün düzu
Dəlidən , səydən çıxdı.
xxx
Vətəndə bişən aşı,
Doyurmur vətəndaşı.
Qarışdı hər gün başı,
Məzədən, meydən çıxdı.
xxx
Dırmanar goyə yolun,
Boşunu döyər dolun.
Qoynunda qalan qolun,
Qisməti göydən çıxdı.
Etibar Qara
