“Güzgülü” ballar, “qısır” məktəblər, “legioner” şagirdlər və daha çox uğur qazananlar

Masallı rayonu üzrə bu ilki qəbul imtaharlarının  nəticələrinə ötəri baxış...

 2018-ci ildə  Masallıdakı 65 tam orta məktəbin 1489 nəfər bitirib. Onlardan cəmi 734 nəfəri ali məktəbə sənəd verib. Göründüyü kimi,  bu ilki məzunların yarıdan çoxu, 755 nəfəri ali məktəbə sənəd verməyib. Ali məktəbə sənəd verən 734 nəfərdən isə 500 nəfəri (onlardan bir neçəsi imtahansız tələbə qəbul edən ali məktəblərə daxil olub) qəbul olunub.

Bəzi müqayisələrə nəzər salaq.

 Öncə müasir tipli məktəblərin nəticəsinə diqqət yetirək..

Ərkivan qəsəbəsində 4 tam orta məktəb var- 1 saylı (Abbaslı məhəlləsi), 2 saylı (Bədirli), 3 saylı (Bağlaküçə) və 4 saylı Həsənəküçə tam orta məktəbləri.

Bu məktəblərdən ancaq 1- i müasir tiplidir-Bədirli məktəbi. Bu məktəbin də qəbuldakı nəticələri  Ərkivandakı digər, həm də təmirsiz, bərbad vəziyyətdə olan məktəblərə nisbətən ən aşağıdır. Nəzərə alsaq ki,  Bədirli məktəbinin tələbə adını qazananların 2-si “legionerdir”. Yəni adı burada, özü Bakıda olanlardır. Onda mənzərə daha da aydınlaşar. (Onu da qeyd edək ki, rayon üzrə “legioner”lər, yəni adı burada, özləri Bakıda, eləcə də digər yerlərdə olan şagirdlər haqqında ətraflı yazı hazırlamağa statrt vermişik. Bu barədə məlumatı olanlar bizimlə əlaqə saxlaya bilərlər).

 Ərkivanda  təmirə görə ən bərbad vəziyyətdə olan Ərkivan 1 saylı tam orta məktəbi isə bu ilki nəticələrinə görə nəinki qəsəbə üzrə, eləcə də rayon üzrə nəzərəçarpacaq uğurlara imza atıb. Belə ki, rayon üzrə, yeganə qızıl medalçı bu məktəbin payına düşür. Məktəbin 2 şagirdi 650-dən yuxarı, 676 bal yığan İradə isə rayon üzrə qızlar arasında ən yüksək nəticə göstərib. Məktəbin digər 2 şagirdi 600-ə yaxın, 500-dən artıq bal yığıb.

 Yeri gəlmişkən uğurları da unutmayaq. Masallıda 600-dən yuxarı bal yığanların, eləcə də 500 həddini keçənlərin sayı ötən illə müqayisədə artmışdır. Ucqar kəndlərə təhsil alıb, tələbə adını qazananlar arasında qızların sayının artması da fərəh doğurur.

 Bütün bunlarla yanaşı qəbulun nəticələrinə görə  təəssüf doğuran nəticələrə tuş gələn məktəblər də vardır.

Rayonda  bir qədər kobud da çıxsa, 3 “qısır” məktəb də var. Onlardan 2-si yaxın illərdə yüksək səviyyədə təmir edilmiş Hüseyhacılı və Yedioymaq 1 saylı məktəbidir ki, bir məzunları belə ali məktəbə qəbul olunmayıb. Qarğalıq tam orta məktəbini bu il 10 nəfər bitirib, onlardan cəmi 1 nəfəri ali məktəbə sənəd verib, o da qəbul olunmayıb.

Şəhər 1 saylı tam orta məktəbinin nəticələri də maraq doğurur. Məktəbi 107 nəfər bitirib. Onların təxminən  yarısı – 59 nəfəri ali məktəbə sənəd verib və bunlardan 55 nəfəri tələbə adını qazanıb. Bu rayon üzrə qəbulun 10 faizindən də bir qədər çoxdur.

Bu 55 nəfərin  içində maraq doğuran nüanslar da  var. Belə ki, 1 saylı məktəbin tələbə adını qazananlarından   6 nəfərinin balları “güzgülüdür”

•  1 nəfər 600,  1 nəfər 500, 1 nəfər 400, 1 nəfər 300, 2 nəfər 200 (Lap keçmiş təhsil başqanı Astan İbişovun sonu 600-lə bitən maşınlarının nömrəsinə oxşayır)

Həmçinin 1 saylı məktəbinin bu 55 nəfərindən 5 nəfəri imtahansız, ancaq attestatla tələbə qəbul edən Moskva və Kazan universitetlərinə qəbul olunub.

Rayon üzrə 600-dən yuxarı bal yığanların 1-ci 20-liyində  ordenli-medallı məktəblərin heç bir məzunu düşə bilməyib. Həmin 20-likdə isə şəhər məktəblərindən ancaq 1-nin şəhər 3 saylı məzunun adı var. Ən adi müqayisədən də bəlli olur ki, bəzi ucqar, azsaylı şagirdləri olan məktəblərin nəticələri bəzi “bərkgedən” məktəblərdən xeyli üstündür.

Ən yaxşı göstəricilər isə Boradigah 2 saylı.  Ərkivan 1 saylı, Mahmudavar, Qəriblər və digər məktəblərə məxsusdur.

Qeyd:    Ali təhsil müəssisələrinə  sənəd verən və qəbul olan  abituriyentlərin sayı haqqında məlumat  məktəb rəhbərlərinin verdiyi məlumata uyğun qeyd olunmuşdur .

                                                                                                         Şəfa.A