Jurnalistin həbsinin səbəbi məlum olub.
Bildirilir ki, o, iyulun 15-də Kremlin sahilində təkbaşına etiraza çıxıb və Rusiya hakimiyyətini Ukraynada uşaqların ölümündə ittiham edib.
Ovsyannikova müharibə əleyhinə plakatla bu dəfə "352 uşaq ölüb. Dayanmaq üçün daha neçə uşaq öldürmək lazımdır?" yazıbmış.
*****
Ukrayna müharibəsinə etiraz olaraq canlı yayıma posterlə çıxan “Birinci Kanal”ın keçmiş redaktoru Marina Ovsyannikovanın niyə saxlanıldığı haqda bilgi verilmir
Hüquq-mühafizə orqanları jurnalist Marina Ovsyannikovanı Moskva vilayətində saxlayıb. Bu barədə “Diqqət, xəbərlər” Telegram kanalı məlumat yayıb.
Hüquq-mühafizə orqanlarının əməkdaşları “Birinci Kanal”ın keçmiş redaktorunun Moskva vilayətində yaşadığı ünvana gəliblər. Hazırda həbsin səbəbi açıqlanmır.
İyulun 4-də məlum olub ki, “Birinci Kanal”ın keçmiş redaktoru Marina Ovsyannikova 11 yaşlı qızının taleyi ilə bağlı məhkəmə prosesi üçün Rusiyaya qayıdıb.
Marina Ovsyannikova, martın 14-də “Zaman” ("Vremya") verilişinin axşam efirində Ukrayna ərazisindəki hərbi əməliyyatlar və yalan təbliğatlara etiraz olaraq plakat açandan sonra bütün dünyada məşhurlaşmışdı. Onu studiyada həbs etsələr də, 30 min rubl cərimə edildikdən sonra azad edilmişdi. Jurnalist demişdi ki, saxlanılanda bütün gecə və ertəsi gün ondan hansı xüsusi xidmət orqanları ilə əlaqəli olduğum barədə soruşublar: “Onlar sona qədər inana bilmirdilər ki, mənim heç bir şərikim yoxdur, Qərb xüsusi xidmətlərində işləməmişəm, həmkarlarımla heç bir münaqişəm olmayıb, Ukraynadan olan qohumlar mənə heç nə yazmayıblar. İnanmaq istəmirdilər ki, “Birinci kanal”ın sıravi işçisiyəm, Mİ6, FTB və ya Mossadla əlaqəm yoxdur”.
Həmin vaxt o etdiyi hərəkətə görə özümü qəhrəman kimi deyil, tükənmiş və yorğun hesab etdiyini demişdi. “Narazılıq məndə çoxdan yetişmişdi. Müharibə başlayanda isə elə bir emosional sarsıntı keçirdim ki, həqiqətən də bir neçə gün nə yeyə, nə içə, nə də yata bildim. İşdə isə o günlər sadəcə, dəhşətli ab-hava var idi: xəbərlər, təbliğat dayanmadan gedirdi. Əslində baş verənlərlə “Birinci kanal”da göstərilənlər arasındakı uyğunsuzluq o qədər güclü idi ki, mən dəlicəsinə bunu dayandırmaq istəyirdim. İş həftəsi bitəndə anladım ki, daha bu kanala gəlməyəcəyəm. Müharibə əleyhinə küçəyə çıxanları isə dərhal polis bölməsinə aparırdılar. O zaman düşündüm ki, daha təsirli etiraz aksiyası təşkil edim. Yaxınlıqdakı dəftərxana ləvazimatları mağazasına getdim, vatman kağızı, flomaster aldım. Bazar günü şüarı hazırladım və bazar ertəsi işə gəldim. Plakat bir müddət maşında qaldı, sonra pencəyimin qoluna qoyaraq gətirdim. Heç kim orada nə olduğunu bilmirdi. Əlimdə pencək, redaksiyaya girdim, tez posteri qolumdan çıxarıb onunla birbaşa studiyaya girdim. Polis məndən şübhələnmədi, çünki “Vremya” verilişinin mövcud olduğu 50 il ərzində heç vaxt belə hal olmayıb. Mən 90% faiz əmin idim ki, bunu edə bilməyəcəm. Ya dizlərim titrəyəcək, ya da rejissor kameranı çox tez efirdən çəkəcək və heç kim məni görməyəcək. İngilis dilində olan mətn Qərb ictimaiyyətinə rusların müharibə əleyhinə olduğunu göstərmək üçün, rus dilində olan mətn isə Rusiya ictimaiyyəti üçün idi- onları təbliğata getməməyə çağırırdım”,- deyə o bildirmişdi.
Orxan ƏLİYEV,
Musavat.com