Lənkəranın Osakücə kəndində dünyaya göz açan, Azərbaycan Yazıçılar Birliyinin üzvü, "Qızıl qələm" media mükafatının laureatı, gənc şair Ziya Dilsuzun sayca üçüncü, "Ayrılıq və Nöqtə" şeirlər kitabı işıq üzü görüb. Kitabda məhəbbət mövzusunda ayrı-ayrı şeirlər və bir poema yer alıb.Yeni kitabın redaktoru AYB-nin Lənkəran Bölməsinin sədri, yazıçı Qafar Cəfərli, ön söz müəllifi isə şair Ağamir Cavaddır.
Qeyd edək ki, Ziya Dilsuzun bundan öncəki digər kitablarının adı "Sənazlığı" və "Sevməyin düsturu" adlanır.
Kitabı çap olunan digər gənc şair isə Əyyub Türkaydır.
Əyyub Türkayın uşaqlar üçün qələmə aldığı "Balacaların şeir çələngi" adlı kitabında məktəbəhazırlıq qruplarında, bağçada, ibtidai sinifdə təhsil alan uşaqlar üçün müxtəlif mövzulu uşaq şeirləri, təmsillər və tapmacalar yer alıb.
Müasir Azərbaycan şeirinin istedadlı nümayəndələrindən olan Əyyub Türkay (Əyyub Ağakərim oğlu Məmmədov) 1988-ci ildə Lənkəran şəhərində anadan olub. 2008-ci ildən Cənub Televiziyasında teleaparıcı-jurnalist vəzifəsində çalışmaqla yanaşı, dövrü mətbuatda publisistik məqalələri ilə çıxış edir. Azərbaycan Jurnalistlər Birliyinin üzvüdür (2020). İxtisasca texnologiya müəllimi olan Əyyub Türkay uşaqlar üçün qələmə aldığı "Balacaların şeir çələngi" adlı kitabı ilə ilk dəfədir ki, oxucularının görüşünə gəlir.
Cenub.az şairlərin bir neçə şeirini təqdim edir:
Ziya Dilsuz:
Tanrı əlindən saldı yer kürəsini
Kimsə çalışmadı, qaranlıqlara
Özü boyda işıq yandırmaq üçün.
Tanrı da əlindən yer kürəsini
Qəsdən saldı yerə sındırmaq üçün.
Azdıra bilmirəm, qova bilmirəm,
Ömür arxam ilə gəlib sürünür.
31 yaşımda mənim gözümə
Ayrılıq bambaşqa rəngdə görünür.
Hər kiçik itkiyə kədərlənmədim,
Adama itki də bəzən gərəydi.
Məni küskünlükdə qınayan biri,
Kimi itirmişdim, hardan biləydi?
Hansı uzaqlarda olursa, olsun,
Çıxıb arxasıyca qaçıb gedəsən.
Ümid öz özünə heç vaxt böyümür
Vaxtında gərəkdi qulluq edəsən.
Tanrım, səbrinə qurban!
Kimdi xoşbəxtlikdən ürəyi toxdu?
Uşaqtək inciyən indi nə çoxdu,
Bəxtindən küsənin ağlı ki yoxdu,
Küssən, bəxt gözəlləşir?
Bir an düşünmədik səfərimizi,
Dəyişdik yalanla öz yerimizi,
Tanrı bağışlamaz heç birimizi,
Biz günah etməsək də.
Mən şübhələrimi qəlbdən silirdim,
Dərd bildiklərimə bəzən gülürdüm,
Bütün adamları adam bilirdim,
Aldadırdım özümü.
Görməkdən adamın gözü də bezib,
Yüzündən soruşsaq, yüzü də bezib
Dünyadan dünyanın özü də bezib,
Tanrım, səbrinə qurban!
Əyyub Türkay
=QOL SAATI=
Qol saatın çox sevir,
Bizim üç yaşlı Aygün.
Qələmlə öz qoluna,
Saat çəkirdi hər gün.
Elə bilir qoluna,
Gerçək saat bağlayır.
Çəkdiyi saat şəkli,
Silinəndə ağlayır.
Atası bunu gördü,
Birdən yadına saldı.
Balaca dəcəl qıza,
Oyuncaq saat aldı.
Aygün çox sevinirdi
Artıq saat taxırdı.
Üzündə xoş təbəssüm,
Atasına baxırdı.
KƏNANIN YALANI
Dərsini öyrənmədi,
Bu gün məktəbli Kənan.
Dedi, müəllim soruşsa,
Tez söylərəm bir yalan.
Dərsi başlayan zaman,
Qorxu tutdu Kənanı.
Axı, birazdan onun,
Çıxacaqdı yalanı.
Müəllim gördü şagird,
Gərgin görünür yaman.
Çünki boşa çıxmışdı,
Onun qurduğu plan.
Dedi: -Kənan bilirəm,
Dərsə hazır deyilsən.
Bu gün nəticə çıxar,
Öyrən gələn dərsi sən.
Kənan söz verdi daha,
Oxuyub, çalışacaq.
Yalanları unudub,
Düzünü danışacaq.
Cenub.az