Şəhid anası Səriyyə xanım:-Mətləb Hacıyev günahsızdır və o oğlumu öldürməyib. Məhkəmə prosesində gizir Mətləb Hacıyevdə açıq şəkildə İlkini öldürmədiyini sübut etsə də, Məhkəmə hakimi buna əhəmiyyət vermir və işi ört bastır edib, tez-tələsik sifarişli hökm çıxarmaq istəyir.
Həmişə cəsarətli, obyektiv fəaliyyəti ilə diqqət çəkən Azərbaycandakı “İşgəncələr Əleyhinə Araşdırmalar Mərkəzi” bu günlərdə Masallı rayonunda şikayətçilərlə görüş keçirdi. 10-a yaxın şikayətçinin dərd-sərini dinlənildiyi tədbir canlı yayımla izlənilirdi.Mərkəzin mətbuat xidmətindən aldığımız məlumatda bildirilir ki,
Tədbirdə mərkəzin sədri Fikrət Cəfərli, İH-nin üzvləri Nasir Əliyev və Rafik Piriyev 20 aprel 2022-ci il tarixində Masallı rayonunda hüquqları pozulmuş bir qrup vətəndaşlarla görüşmüşdür.
Görüş zamanı Kəlbəcərdə öldürülmüş əsgər Zöhrabov İlkin Ramil oğlunun anası Səriyyə xanım bildirdi ki, onun şəhid olmuş oğlunun istintaqı düzgün aparılmayıb. Səriyyə xanım bildirdi ki, hal-hazırda Tərtər Hərbi Məhkəməsində oğlunun öldürülməsində ittiham olunan gizir Mətləb Hacıyev günahsızdır və o oğlumu öldürməyib. Məhkəmə prosesində gizir Mətləb Hacıyevdə açıq şəkildə İlkini öldürmədiyini sübut etsə də, Məhkəmə hakimi buna əhəmiyyət vermir və işi ört bastır edib, tez-tələsik sifarişli hökm çıxarmaq istəyir. Qəti olaraq buna etiraz edirəm və işin yenidən istintaqa qaytarılmasını tələb edirəm. Xatırladırıq ki, İlkin Zöhrabovun istintaqını Tərtər cinayətləri zamanı hərbçilərimizə ağır işgəncə verməkdə adı daha çox hallanan müstəntiq Elşən Mürsəlov aparıb.
“Oğlum döyüşdə yaralansa da veteran adı verilmir”
Şikayətçi Abdinov Samir Etibar oğlunun xidmətdə olduğu zaman, döyüş postunda düşmən-erməni əsgərləri tərəfindən yaralansa da ona veteranlıq verilməməsindən şikayətçi olduğunu vurğuladı. Müdafiə Nazirliyinə və digər müvafiq qurumlara dəfələrlə müraciət etsə də, heç bir nəticəsi olmamışdır. Vətəndaş hərbi xidmət keçdiyi zaman yaralanmış oğluna veteranlıq statusunun verilməsini tələb edir.
Digər şikayətçilər Ağayeva Gülbahar, Ağayev Miriş, Nurullayev Cəsarət, Nəzərov Elşən, Teyyubov Əhliman, Qurbanov Saleh və Yaqubov Zahir polis özbaşınalığından, qeyri-insani rəftardan, sosial yardımların alınmasında onlardan rüşvət istənilməsindən və pensiyalarının əsassız kəsilməsindən şikayətçi olduqlarını dedilər və hakimiyyətdən qanunsuzluqlara son verilməsini tələb etdilər.
“İşgəncələr Əleyhinə Araşdırmalar Mərkəzi” olaraq şikayətçilərlə bağlı aidiyyəti orqanlara müraciət ediləcəyini bildirdi.Xatırladırıq ki, digər problemi olan şəxslər də bu mərkəzə müraciət edə bilər. Yaxın vaxtlarda isə Mərkəzin rəhbəri Fikrət Cəfərli ilə müsahibə almağı planlaşdırırıq.
Cenub.az. Faiq Hüseynzadə