Sentyabrın 3-də Masallı Regional Mədəniyyət İdarəsinin rəisi Bəxtiyar Qılıncov, idarənin aparat işçiləri və Cəlilabad rayonunda fəaliyyət göstərən mədəniyyət müəssisələrin əməkdaşlarının iştirakı ilə Cəlilabaddakı təmizlik aksiyası keçiriblər. Tarixi abidə ərazilərində təmizlik-abadlıq işlərinin görülməsi, həmçinin abidələrin ölkə mədəniyyəti üçün əhəmiyyətinə ictimaiyyətin diqqətinin cəlb edilməsi məqsədi daşıyan iməcilik tədbirləri bu dəfə rayonun Günəşli kəndindəki tarixi-dini abidənin ərazisində təşkil edilib.Aksiya müddətində XIX əsrə aid olan kilsənin ərazisi və daxili kollardan, tullantılardan təmizlənib.
Qeyd edək ki, rus pravoslav dini icmasına mənsub olmuş bu tikili ölkə əhəmiyyətli tarixi-memarlıq abidələrinin siyahısına daxil edilib, tarixi abidə və ölkədəki dini tolerantlığın nümunəsi kimi mühafizə olunur. Əlavə edək ki, sözügedən dini abidə rayon ərazisində mövcud olan xristian məbədləri arasında həcm və memarlıq quruluşuna görə fərqlənir.
Masallı Regional Mədəniyyət İdarəsinin Mətbuat Xidməti