Rayon “gözləmək rejimindədir”. Şikayətçilərin əksəriyyətinə bir cavab verilir;- təzə başçı gəlsin, sonra baxarıq
Cəlilabad Rayon İcra Hakimiyyətinin Başçısının korrupsiya ilə bağlı həbsindən artıq altı ay keçir. Altı aydır ki, rayona hələ də icra başçısı təyin edilməyib. Rayonda Hüquq mühafizə orqanlarından başqa demək olar ki, digər qurumların fəaliyyəti görünmür və ya bəzilərinə öz korrupsiya əməllərini davam etdirmək üçün daha yaxşı fürsət yaranıb. Sosial şəbəkələrə nəzər salsaq, əhalinin ən çox istifadə etdiyi xidmət sahələri olan səhiyyədən və təhsildən narazılıq daha pik həddə çatıb.
Cenub.az
Cəlilabad Rayon İcra Hakimiyyətinin Başçısının korrupsiya ilə bağlı həbsindən artıq altı ay keçir. Altı aydır ki, rayona hələ də icra başçısı təyin edilməyib. Rayonda Hüquq mühafizə orqanlarından başqa demək olar ki, digər qurumların fəaliyyəti görünmür və ya bəzilərinə öz korrupsiya əməllərini davam etdirmək üçün daha yaxşı fürsət yaranıb. Sosial şəbəkələrə nəzər salsaq, əhalinin ən çox istifadə etdiyi xidmət sahələri olan səhiyyədən və təhsildən narazılıq daha pik həddə çatıb. Qənaətbəxş səviyyədə olmasa da, Göytəpə şəhərində xəstəxananın bağlanması əhalinin ciddi narazılığına səbəb olmuşdu. Göytəpə İcra Nümayəndəliyinin qarşısına toplaşan şəhid ailələri və əhalinin digər təbəqələrinin narazılığını görən Kərəm Həsənov və Malik Həsənov qardaşlarının yeni xəstəxananın tikiləcəyi sözündən sonra əhali dağlışsa da əhalinin narazılığı davam etməkdədir. Diabet və digər güzəştli xəstələrə olunan xidmətdən və doğum şöbəsinin fəaliyyətindən istifadə üçün rayon mərkəzinə gediş-gəlişdən insanların narazılığı daha çoxdur . Bu vəziyyətdə ana və uşaq ölümlərinin sayının daha artacağı gözlənilir.
Ölkə ərazisində korrupsiya ilə ad qazanmış Cəlilabad təhsilində rüşvət halları yüksələn xətlə hələ də davam etməkdədir. Əvvəllər Rayon İcra Hakimiyyətini bəhanə edərək açıq şəkildə aylıq yığdıran RTŞ müdiri üçün daha münbit şərait yaranıb, desək yanılmarıq. Təhsildəki “alış-veriş” münasibətlərinin onun keyfiyyətinə təsir edəcəyi heç kəs də şübhə doğurmasa da bu yaxınlarda Cəlilabad rayon ərazisindəki təhsil müəssisələrini yoxlamaq üçün Təhsil Nazirliyinin yoxlamalarının narazı getməsi bu ərazidə təhsilin bərbad vəziyyətdə olmasını bir daha təsdiqlədi.
Cəlilabad Rayon İcra Hakimiyyəti isə öz durğunluq dövrünü yaşayır. Son zamanlar əsasən Şəhid ailələri və Qazilərin müraciətlərinə yumşaq dildə “ Başçı təyin edilməyib deyə heç nə edə bilmərik” deyib yola salırlar.
Ümumi baxsaq, rayon ərazisində hələlik nisbi sakitlikdir. Bunun iki səbəbi var : Birinci səbəbi mövsümlə əlaqədar olaraq hər kəsin əkin-biçinlə başının qarışıq olması, digər səbəbi isə Rayon İcra Hakimiyyətinin Başçısının olmamasıdır. İnsanlar əsasən şikayətlərə baxılanda şikayət edir, əks təqdirdə taleyi ilə barışıb gözləyir. Rayonun bu günkü vəziyyəti “gözləmə rejimindədir” desək, doğru olar.
Bir məqamı da xatırladım ki, İcra Başçısız keçən son 6 ayda Cəlilabadda abadlıq adına hansısa bir işin görüldüyünü xatırlamaq çətindir.
Zaur Kəngərli. Cəlilabad rayonunun Göytəpə şəhər 1 saylı tam orta məktəbinin müəllimi
Qeyd: Onu da xatırladaq ki, hazırda daha bir cənub rayonunda –Lerikdə də 1 aya yaxındır ki, icra başçısı yoxdur. Adamın yadına istər-istəməz Məmməd Arazın misraları düşür-
Əgər yoxluğunda yoxsa varlığın,
Demək , varlığında sən elə yoxsan.
Cenub.az