Türkiyənin ilk və Avropanın ən böyük film platforması olan MIDWOOD İstanbul Film Studiya Kompleksi üçün geri sayım başlayıb.İstanbul Büyükçəkməcədə 400 min kvadratmetr sahədə qurulan MIDWOOD idarə heyətinin sədri Ahmet San tərəfdaşların layihəyə 200 milyon dollar sərmayə qoyduğunu açıqlayıb.
Belə ki, layihənin yaradacağı əlavə dəyərlə Türkiyə iqtisadiyyatına illik 200 milyon dollar valyuta daxil olması gözlənilir. Nəhəng kompleks tam gücü ilə fəaliyyətə başlayanda 15 min nəfəri işlə təmin edəcək. San "Türkiyənin 100-cü ildönümü layihəsi olaraq özünü göstərən və dünya markası olmaq məqsədi ilə yola çıxan MIDWOOD, rəsmi açılış tarixi 29 oktyabr 2023-cü ildir" deyib.
O bildirib ki, bu il platformanın çatışmazlıqlarını görmək üçün rəsmi açılışdan əvvəl 4 film çəkiləcək.
MIDWOOD studiyoları eyni vaxtda 4 Hollivud istehsalı ilə eyni vaxtda çəkiliş aparmağa imkan verən, o cümlədən 6 Bollivud, Chinawood və Avropa və Türkiyə kino sənayesi üçün 10 film üçün tam xidmət göstərə biləcək.
Beləliklə, 15-i böyük Hollivud istehsalı olan digər kateqoriyalar üzrə 35 müxtəlif istehsal gücü ilə ildə 50 film tutumuna çatacaq.
Qeyd edək ki, bu platform Türkiyənin kino sənayesi üçün ilk olsa da, ölkənin yerli istehsalı olan fimlərin ixracı ildən-ilə artır.
Belə ki, Türkiyədə 1994-cü ildə cəmi 14 serial çəkilib. Hazırda isə ildə 200 serial çəkilir. Həmin seriallar isə 146 ölkəyə ixrac edilir. Bu gün serial sektorunda ABŞ ilə zirvəni bölüşən Türkiyənin gəliri 1 milyard dolları aşıb. Bu gün televiziya kanalları ilə yanaşı internet platformasında da serial yarışı başlayıb. Bu isə sektorun dünyaya yayımlanmasında da mühüm rol oynayır. Hazırda 150-dən artıq türk serialı Avropa, Yaxın Şərq, Afrika, Şimali və Cənubi Amerika da daxil olmaqla 146 ölkədə yayımlanır.
Mütəxəssislər hesab edir ki, bu uğurun bir çox sirləri var. Bəzi prodüserlər deyirlər ki, danışdıqları hekayələrin universal xarakter daşımasının, onların maraqla qarşılanmasında payı çoxdur. Bundan əlavə, Türkiyənin Avropa ilə Asiya arasında körpü rolunu oynayan bənzərsiz yeri və mədəni quruluşu dünyanın müxtəlif yerlərində serialların maraqla izlənməsinə öz töhfəsini verir.
Xaricdə ən populyar türk serialları, melodramlar və intriqalı, tarixi dramlardır. Bununla yanaşı türk serialları Türkiyə turizminə də böyük dəstək olur. Çili, Uruqvay, Pakistan, Serbiya, Rumıniya və hətta ABŞ kimi ölkələrdə türk seriallarını böyük maraqla izləyirlər. Eyni zamanda, serialların çəkildiyi yerləri görmək üçün Türkiyəyə gələn turistlər də çoxdur. Televiziya serialları sayəsində Türkiyəyə gəlib türkcə öyrənənlərin sayı da kifayət qədərdir.
Göründüyü kimi bu gün qonşu ölkənin film sektoru hər il daha da irəliləyişə nail omaqla həm ölkə iqtisadiyyatına gəlir təmin edir, həm də Türkiyəni təbliğ edərək, ölkə turizminə dəstək olur. Təbii ki, bütün bunlar bu sahədə fəaliyyət göstərən mütəxəssislərin sayəsində baş verir. Ölkəmizdə isə bu sektor nəinki ixracı, heç daxili istehlakı belə təmin edə bilmir. Bu bir faktdır ki, 30 il ərzində Azərbaycan torpaqlarının Ermənistan tərəfindən işğalı zamanı mövcud reallıqları dünyaya çatdırmaq üçün güclü bir filmin ərsəyə gəlməsini gözləsək də bu baş vermədi. Həmin müddət ərzində cəmi 1-2 film istisna olmaqla, nəinki tarixi reallıqlar, heç ailə-məişət mövzusunda belə, filmlər, o cümlədən seriallar ekranlaşdırılmadı.
Son illər televiziya kanalları serial arzusuna düşsələr də həmin seriallar heç daxili bazarda belə, tamaşaçı rəğbəti qazanmadı. Çünki həmin seriallarda tamaşaçı böyük maraqla izlədiyi xarici seriallardakı keyfiyyəti görə bilmir. Aktyorluqdan xəbəri olmayan "ucuz işçi qüvvəsi" və mahiyyəti olmayan senarilərin ortaya çıxardığı bayağı seriallar isə bu gün Azərbaycan film bazarı üçün heç nə vəd etmir. Əgər bu proses davam edərsə, bu gün daxildə belə tamaşaçı toplamayan film, seriallarımızla dünya film bazarına daxil ola bilməyəcəyik.
Bu isə o deməkdir ki, turizmi prioritet elan etsək də, turizm ölkəsinə çevrilə bilmədiyimiz kimi keyfiyyətli bir film, serial çəkib bu sektordan da iqtisadiyyata heç nə qazandıra bilməyəcəyik. Beləliklə, biz bu gün nəinki dünya film bazarına çıxa bilmirik, film platformasının da reallaşmasını ancaq xəyal edə bilərik. Nəticədə bu sektorun köməyi ilə nə ölkəni təbliğ edə, nə valyuta qazana, nə də turist cəlb edə bilməyəcəyik.
Nigar Abdullayeva
Cebhe.info