Sərt tədbirlərin və qadağaların müəllifləri vətəndaşların problemlərini düşünmək də istəmirlər
Nazirlər Kabineti yanında Operativ Qərargah həftə sonları nəqliyyatın fəaliyyətini qadağan etməklə əhali üçün nəqliyyat problemləri yaratmağa davam edir. Ramazan tətilləri istisna deyildi - 9-15 may tarixlərində də Bakıda ictimai nəqliyyatın işi dayandırıldı.
Bununla birlikdə, bu günlərə yalnız şərti olaraq “qeyri-iş günləri” deyilə bilər, çünki əksər hallarda və yerlərdə iş davam edir. Heç kim bir çox özəl müəssisənin işçiləri üçün bu qaydaya necə əməl olunmasını fikirləşmir. Bundan əlavə, dövlət tibb müəssisələri fəaliyyət göstərir - xəstəxanalar, klinikalar, təcili yardım stansiyaları və s. Lakin qadağan olunmuş avtobuslarla əlaqədar profilli qurumlar tibb işçilərinin işə necə gəlib çatması ilə maraqlanmır.
Təcili Tibbi Yardım işçiləri ilə söhbətlərində davamlı nəqliyyat blokadası səbəbindən ciddi narahatlıqlara məruz qaldıqlarını söyləyiblər. Yeri gəlmişkən, vəd edilmiş “koronavirus müavinətlərindən” bilinməyən bir səbəbdən məhrum olan tibb işçiləri tətil və həftə sonları Operativ Qərargah tərəfindən yaradılan nəqliyyat problemlərini müstəqil şəkildə həll etməli olurlar.
“İctimai nəqliyyat olmadığından işə getmək üçün taksi və ya yoldan keçən avtomobilləri tutmalıyıq”, - deyə paytaxtın təcili yardım stansiyasının tibb işçiləri bildiriblər.
Klinika və xəstəxanaların tibb işçiləri mütəmadi olaraq maaşlarından taksiyə pul ödəməyə məcburdurlar. Şəhərdəki poliklinikalardan birində bizə deyilənə görə, nəqliyyat çatışmazlığı səbəbindən yaxınlıqda yaşayan həkimlər, tibb bacıları və digər işçilər piyada gəlməyə məcbur olurlar.
“Qalanları şəxsi maşınlar və taksilər vasitəsi ilə işə çatmalıdır. Bu çox əlverişsizdir. Üstəlik yol xeyli baha başa gəlir. Koronavirusla mübarizə cəbhəsində çalışan həkimlər niyə bu cür narahatlığa dözməlidirlər?”, - deyə onlar sual edirlər.
Avtobuslarda və metroda dövri qadağalardan əziyyət çəkən təkcə tibb işçiləri deyil. Artıq qeyd olunduğu kimi, Bakıda bir çox obyekt və müəssisə həftə sonları və tətillərdə bağlanmır - işçiləri taksi xidmətlərini özlərinin çox olmayan maaşlarından ödəyərək, öz hesablarına işə getmək məcburiyyətində qalırlar.
Vətəndaşlar vəziyyətdən çıxmağın yeganə yolunun “manatlıq” deyilən taksilərin - özəl maşınları ilə xidmət göstərən sürücülərin olduğunu etiraf edirlər. Xidmətlərinin dəyəri lisenziyalılardan bir neçə dəfə aşağıdır - 1-3 manat.
Məsələn, ərzaq mağazasının xanım satıcısının sözlərinə görə, əgər “manatlıq” taksilər olmasaydı, demək olar ki, gündəlik qazancını işə gedib-gəlmək üçün ödəməli olardı: “İşəgötürənləri nəqliyyat problemi maraqlandırmır. İşdə olmalısan, vəssalam! Əks təqdirdə işdən çıxarılacaq və yaxınlıqda yaşayan başqa biri götürüləcək”.
Bir sözlə, “manatlıq” taksilər çıxılmaz vəziyyətə düşən insanlar üçün vəziyyətdən yeganə çıxış yolu olaraq qalır. Lakin Bakı Nəqliyyat Agentliyi (BNA) rəhbərliyinin son açıqlamasından anlaşılır ki, qurum əhalini bu fürsətdən də məhrum etmək istəyir.
BNA sədri Vüsal Kərimli tabeliyində olan qurumun vətəndaşlara əlçatan olan bu nəqliyyatla mübarizə aparmağa hazır olduğunu açıqladı. Onun fikrincə, tıxacların səbəblərindən biri də gediş haqqı 1 manat olan qanunsuz taksi fəaliyyətidir. Qurum rəhbəri Agentliyin bu cür sürücülərə pul cəzası kəsmək səlahiyyətində olmadığını desə də, bununla belə, bu qanunsuzluqla mübarizəyə atılmağa hazır olduqlarını bəyan etdi. Təbii ki, qanunvericilikdəki boşluqlar aradan qalxdıqdan sonra.
Bununla yanaşı, nəqliyyat kollapsının təşəbbüskarları və metro və avtobusların istismarı ilə bağlı hər cür qadağaların müəllifləri bu tədbirlərin koronavirusla mübarizədə effektivliyi barədə heç bir açıqlama vermirlər. Üstəlik, həftə sonları ictimai nəqliyyatın dayandırılması və ya metronun qadağan edilməsi ilə yoluxma sayının nə qədər azaldığını heç kim bilmir. Axı virusun yalnız həftə sonları avtobusdan istifadə edən sərnişinlərə yoluxma bacarığı yoxdur.
Bundan əvvəl millət vəkili Vüqar Bayramov ictimai nəqliyyat işlərinin həftə sonları bərpa olunmasını təklif etmişdi. Sosial şəbəkədəki səhifəsində trafiki məhdudlaşdıran sərt tədbirin yoluxmuşların sayının azalmasına səbəb olub-olmadığının hələ bilinmədiyini yazdı. Ancaq bu addımın bayram günlərində və həftə sonları çalışan vətəndaşlar üçün mütləq problemlər yaratdığını vurğuladı.
“İndiyə qədər heç bir ölkədə həftə sonları ictimai nəqliyyatda qadağanın infeksiyanın yayılmasına təsirini ölçmək üçün xüsusi metodlar yoxdur. Artıq belə bir təcrübəyə sahibik - Novruzda ictimai nəqliyyat işləmədi, amma tətildən sonra infeksiya sayında artım müşahidə edilidi. Buna görə də qeyri-iş günləri və həftə sonları avtobusların işləməsinə icazə verilməsi daha məqsədəuyğundur”, - deyə deputat əlavə etdi.
ayna.az